धुळे | एकीकडे कडक उन्हाळ्याच्या झळा वाढू लागल्या असून धुळेकरांना पाणीटंचाईचा सामना करावा लागत आहे, तर दुसरीकडे शासकीय कार्यालयांमध्येच पाण्याची वारेमाप उधळपट्टी होत असल्याचा धक्कादायक प्रकार समोर आला आहे. धुळे आरटीओ कार्यालयाच्या आवारात तोतया एजंट खुशाल आपल्या चारचाकी गाड्या धुवत असून, आरटीओ प्रशासनाचे याकडे सोयीस्कर दुर्लक्ष होत असल्याचा आरोप नागरिकांनी केला आहे.
प्रशासनाच्या नाकाखाली पाण्याचा अपव्यय
मिळालेल्या माहितीनुसार, आरटीओ कार्यालयाच्या परिसरात काही अनधिकृत व्यक्ती आणि तोतया एजंट आपल्या चारचाकी वाहनांची खुलेआम धुलाई करत आहेत. या धुलाईसाठी मोठ्या दाबाने पाण्याचा वापर केला जात असून, हजारो लिटर पाण्याची नासाडी होत आहे. विशेष म्हणजे, ज्या ठिकाणी नियमांचे पालन होणे अपेक्षित आहे, त्याच आरटीओ कार्यालयाच्या आवारात वरिष्ठ अधिकाऱ्यांच्या डोळ्यासमोर हा प्रकार राजरोसपणे सुरू आहे.
महानगरपालिकेच्या नियमांना हरताळ
धुळे महानगरपालिकेकडून सध्या उन्हाळ्याच्या पार्श्वभूमीवर नागरिकांना पाणी जपून वापरण्याचे आवाहन केले जात आहे. मात्र, आरटीओ कार्यालयातील कर्मचारी आणि तोतया एजंट यांच्या संगनमताने सुरू असलेल्या या चारचाकी वाहनांच्या धुलाईमुळे मनपाच्या नियमांचे सर्रास उल्लंघन होताना दिसत आहे.
नागरिकांचा सवाल:
“एकीकडे सामान्य माणसाला पाण्यासाठी वणवण करावी लागत आहे, तर दुसरीकडे शासकीय कार्यालयाच्या अंगणात चारचाकी गाड्या धुवून पाण्याचा अपव्यय केला जात आहे. हा प्रकार आरटीओ अधिकाऱ्यांच्या लक्षात येत नाही का?” असा संतप्त सवाल नागरिक विचारत आहेत.
कडक कारवाईची मागणी
या प्रकारामुळे कार्यालयाच्या परिसरात चिखलाचे साम्राज्य निर्माण झाले असून, कामासाठी येणाऱ्या नागरिकांना याचा त्रास सहन करावा लागत आहे. या प्रकरणाची सखोल चौकशी करून संबंधित चारचाकी गाडी मालकांवर आणि या प्रकाराला खतपाणी घालणाऱ्यांवर तात्काळ कारवाई करावी, अशी मागणी जोर धरू लागली आहे.
