धुळे | प्रतिनिधी
शहरातील पवन नगर (हुडको) भागात स्थानिक गुन्हे शाखेने आणि चाळीसगाव रोड पोलिसांनी संयुक्तपणे धाड टाकून अमली पदार्थांच्या तस्करीचा मोठा पर्दाफाश केला आहे. एका छोट्याशा घरातून अंदाजे तब्बल ५०० किलो गांजा हस्तगत करण्यात आला असून, या कारवाईने संपूर्ण जिल्ह्यात मोठी खळबळ उडाली आहे.
गोपनीय माहितीच्या आधारे धाड
मिळालेल्या माहितीनुसार, पवन नगर हुडको परिसरातील एका घरात मोठ्या प्रमाणात गांजाचा साठा लपवून ठेवल्याची गोपनीय माहिती स्थानिक गुन्हे शाखेला मिळाली होती. या माहितीची खातरजमा केल्यानंतर, स्थानिक गुन्हे शाखेने चाळीसगाव रोड पोलीस ठाण्याच्या पथकाला सोबत घेऊन मध्यरात्रीच्या सुमारास या भागाला वेढा घातला.
छोट्याशा घरातून साठ्याचे डोंगर
पोलीस पथकाने संशयित घराची झडती घेतली असता, पोलिसांचे डोळे पांढरे झाले. एका अत्यंत सामान्य आणि छोट्याशा घरामध्ये गोण्यांमध्ये भरलेला तब्बल ५०० किलो गांजा आढळून आला. मध्यरात्रीच्या सुमारास अत्यंत गुप्तता पाळून ही कारवाई करण्यात आली. या साठ्याची बाजारपेठेत मोठी किंमत असल्याचे सांगण्यात येत आहे.
शहरात खळबळ; तस्करांचे धाबे दणाणले
एवढ्या मोठ्या प्रमाणात गांजाचा साठा शहरात आला कुठून आणि तो कोणाकडे पाठवला जाणार होता, याचा तपास आता पोलीस करत आहेत. या कारवाईमुळे धुळ्यातील अमली पदार्थ तस्करांचे धाबे दणाणले आहेत. या प्रकरणी पोलिसांनी काही संशयितांना ताब्यात घेतले असून अधिक तपास सुरू आहे.
“गोपनीय माहितीच्या आधारे ही मोठी कारवाई करण्यात आली आहे. अमली पदार्थांच्या विरोधात आमची ही मोहीम अधिक तीव्र केली जाईल.”
— पोलीस प्रशासन, धुळे
