धुळे:धुळे शहरात बंदी असलेल्या पाकिस्तानी बनावटीच्या सौंदर्यप्रसाधनांची (कॉस्मेटिक्स) विक्री करणाऱ्या दोन दुकानांवर स्थानिक गुन्हे शाखेने छापा टाकून मोठी कारवाई केली आहे. या कारवाईत एकूण ६१,४७४ रुपये किमतीची उत्पादने जप्त करण्यात आली असून, दोन व्यापाऱ्यांवर गुन्हे दाखल करण्यात आले आहेत.
नेमकी काय आहे घटना?
जिल्हा पोलीस अधीक्षक श्रीकांत धिवरे यांना धुळे शहरात काही व्यापारी बंदी असलेल्या पाकिस्तानी वस्तूंची विक्री करत असल्याची गोपनीय माहिती मिळाली होती. त्यानुसार स्थानिक गुन्हे शाखेचे पोलीस निरीक्षक श्रीराम पवार यांच्या नेतृत्वाखाली दोन पथके तयार करून शहरात छापे टाकण्यात आले.
जप्त केलेला माल आणि ठिकाणे:
पोलिसांनी खालील दोन ठिकाणी कारवाई केली:
१. श्री साई ट्रेडर्स (जय शंकर मार्केट): प्रोप्रायटर कैलास देवानंद नानकाणी (५० वर्षे) यांच्या दुकानातून ३०,०६३ रुपये किमतीची ‘गोरी ब्युटी क्रीम’, ‘चांदनी व्हाईटनिंग क्रीम’ यांसारखी उत्पादने जप्त करण्यात आली.
२. बिग बाजार (सार्वजनिक मार्केट): प्रोप्रायटर फजलूर रहेमान मोहम्मद सलीम अन्सारी (३२ वर्षे) यांच्या दुकानातून ३१,४११ रुपये किमतीची ‘गोरी ब्युटी क्रीम’, ‘डबल व्हाईट’, ‘फेस फ्रेश गोल्ड’, ‘गोल्डन पर्ल’ यांसारखी उत्पादने हस्तगत केली.
कारवाईचे कारण:
भारत सरकारच्या वाणिज्य आणि उद्योग मंत्रालयाच्या अधिसूचनेनुसार, पाकिस्तानमधून होणाऱ्या आयातीवर निर्बंध घालण्यात आले आहेत. असे असतानाही सदर व्यापाऱ्यांनी कोणत्याही अधिकृत बिलाशिवाय या वस्तू विक्रीसाठी ठेवल्या होत्या. तसेच, या सौंदर्यप्रसाधनांमध्ये मानवी शरीरास घातक असणारी रसायने असण्याची शक्यता असल्याने त्यांच्या विक्रीवर बंदी आहे.
या कायद्यांतर्गत गुन्हे दाखल:
आरोपींविरुद्ध धुळे शहर आणि चाळीसगाव रोड पोलीस ठाण्यात खालील कलमान्वये गुन्हे नोंदवण्यात आले आहेत:
विदेश व्यापार (विकास व विनियमन) अधिनियम १९९२
भारतीय न्याय संहिता (BNS)
औषधी व सौंदर्य प्रसाधने अधिनियम १९४०
ही धडक कारवाई पोलीस अधीक्षक श्रीकांत धिवरे, अपर पोलीस अधीक्षक अजय देवरे यांच्या मार्गदर्शनाखाली स्थानिक गुन्हे शाखेच्या पथकाने यशस्वीरीत्या पूर्ण केली. नागरिकांनीही अशा असुरक्षित आणि बंदी असलेल्या उत्पादनांचा वापर टाळावा, असे आवाहन प्रशासनाकडून करण्यात आले आहे.
