धुळे :
खान्देशातील तरुणांना नागरी उड्डाण आणि हवाई वाहतूक क्षेत्रातील (Aviation Sector) करिअरच्या विविध संधींची ओळख व्हावी आणि त्यांना प्रत्यक्ष अनुभव मिळावा, या उद्देशाने खान्देश युथ फाऊंडेशनतर्फे ‘उडाण’ या विशेष उपक्रमाचे आयोजन करण्यात आले आहे. या उपक्रमांतर्गत १६ मार्च २०२६ रोजी सकाळी ८:०० वाजता धुळे विमानतळ येथे एकदिवसीय ‘फील्ड व्हिजिट’ व मार्गदर्शन कार्यशाळा पार पडणार आहे.
विमान आणि कॉकपीटचा प्रत्यक्ष अनुभव
या कार्यशाळेत सहभागी होणाऱ्या विद्यार्थ्यांना केवळ पुस्तकी ज्ञानच नव्हे, तर विमानतळावरील प्रत्यक्ष कार्यपद्धती पाहता येणार आहे. यामध्ये विमानाचे कॉकपीट, सुरक्षा व्यवस्था, विमानतळावरील स्थानिक व्यवस्थापन आणि विविध तांत्रिक उपकरणांचे जवळून निरीक्षण करण्याची संधी मिळणार आहे.
तज्ज्ञांकडून मिळणार मोलाचे मार्गदर्शन
हवाई क्षेत्रातील करिअर म्हणजे केवळ ‘पायलट’ होणे नव्हे, तर त्या पलीकडे असलेल्या अनेक संधींबाबत तज्ज्ञ मार्गदर्शक माहिती देणार आहेत. यामध्ये प्रामुख्याने:
पायलट ट्रेनिंग पाथवे: SPL ते ATPL पर्यंतचा प्रवास.
तांत्रिक कोर्सेस: एअरक्राफ्ट मेंटेनन्स इंजिनिअर (AME).
इतर संधी: ग्राऊंड ऑपरेशन्स, डिप्लोमा इन एव्हिएशन, बी.एस्सी. एव्हिएशन आणि एव्हिएशन मॅनेजमेंट.
या व्यतिरिक्त, विद्यार्थ्यांना या क्षेत्रातील व्यावसायिकांशी थेट संवाद साधून आपल्या शंकांचे निरसन करता येणार आहे.
प्रमाणपत्र आणि नोंदणी
या उपक्रमात दहावी, बारावी उत्तीर्ण विद्यार्थी, डिप्लोमा धारक तसेच विमान वाहतूक क्षेत्रात रस असलेले तरुण-तरुणी सहभागी होऊ शकतात. सहभागी होणाऱ्या सर्व विद्यार्थ्यांना संस्थेमार्फत प्रमाणपत्र दिले जाणार आहे.
नोंदणीसाठी संपर्क:
इच्छुक विद्यार्थ्यांनी आपली नावनोंदणी करण्यासाठी अथर्व पाटील (८१८०९४८८५३) किंवा श्रावणी बोरसे (८२०८०००१४१) यांच्याशी संपर्क साधावा, असे आवाहन खान्देश युथ फाऊंडेशनतर्फे करण्यात आले आहे.
